.jpeg)
বি. বৰুৱা মহাবিদ্যালয়ত 'ধিং এক্সপ্ৰেছ' হিমা দাস: ছাত্ৰ-ছাত্ৰীক ক্ৰীড়াক জীৱনৰ অংগ কৰি ল’বলৈ আহ্বান
বিশেষ প্ৰতিবেদন, ৰাইজৰ বাৰ্তা, ৩ ছেপ্টেম্বৰ:
গুৱাহাটীৰ ঐতিহ্যমণ্ডিত বি. বৰুৱা মহাবিদ্যালয়ত আজি এক বিশেষ মনোগ্ৰাহী পৰিৱেশ সৃষ্টি হয়। আন্তঃৰাষ্ট্ৰীয় খ্যাতিসম্পন্ন ধাৱিকা, 'ধিং এক্সপ্ৰেছ' নামেৰে জনাজাত হিমা দাসে মহাবিদ্যালয়খনৰ ছাত্ৰ-ছাত্ৰীসকলৰ সৈতে এক সৌহাৰ্দ্যপূৰ্ণ মত বিনিময় কাৰ্যসূচীত অংশগ্ৰহণ কৰে।
অনুষ্ঠানত ছাত্ৰ-ছাত্ৰীসকলক উদ্দেশ্যি বক্তব্য ৰাখি অৰ্জুন বঁটা প্ৰাপক এথলীটগৰাকীয়ে জীৱনত অনুশাসন, একাগ্ৰতা আৰু সুস্থ দৃষ্টিভংগীৰ গুৰুত্বৰ বিষয়ে আলোকপাত কৰে। নিজৰ ক্ৰীড়া জীৱনৰ সংগ্ৰাম আৰু সফলতাৰ অভিজ্ঞতা ভগাই লৈ তেওঁ ছাত্ৰ-ছাত্ৰীসকলক দৈনন্দিন জীৱনত সৎ আৰু ভাল অভ্যাস গঢ়ি তুলিবলৈ আহ্বান জনায়।
বিশেষকৈ মানসিক আৰু শাৰীৰিক সুস্থতা বজাই ৰাখিবলৈ ক্ৰীড়াক জীৱনৰ এক অবিচ্ছেদ্য অংগ হিচাপে গ্ৰহণ কৰাৰ বাবে তেওঁ উপস্থিত সকলোকে উৎসাহিত কৰে। হিমাই কয় যে কেৱল পেশাদাৰী খেলুৱৈসকলৰ বাবেই নহয়, বৰঞ্চ প্ৰতিজন ব্যক্তিৰ স্বাস্হ্য সুৰক্ষিত ৰখা আৰু মানসিক দৃঢ়তা গঢ়াৰ বাবে খেলা-ধূলা বা শাৰীৰিক চৰ্চা অতিশয় প্ৰয়োজনীয়।
মহাবিদ্যালয়ৰ প্ৰাংগনত অনুষ্ঠিত এই অনুপ্ৰেৰণামূলক অনুষ্ঠানটিত ছাত্ৰ-ছাত্ৰীসকলেও অতি উৎসাহেৰে অংশ লয় আৰু বিশ্বজয়ী এথলীটগৰাকীৰ সৈতে পোনপটীয়াকৈ বিভিন্ন প্ৰশ্নোত্তৰত ভাগ লয়। অনুষ্ঠানৰ শেষত মহাবিদ্যালয় কৰ্তৃপক্ষ আৰু ছাত্ৰ একতা সভাই হিমা দাসক বিশেষভাৱে সম্বৰ্ধনা জনায়।