কালজয়ী গীতৰ সুৰেৰে যেন নিৰ্বাচনী প্ৰচাৰত নতুন বাৰ্তা দেৱাশীষ শৰ্মাৰ

‘একলাই চলো ৰে’ গীত গাই দেৱাশীষৰ ব্যাপক প্ৰচাৰ

কংগ্ৰেছৰ প্ৰাৰ্থী ঘোষণাৰ অপেক্ষাৰ মাজতে নিৰ্বাচনী মাটিত বিজেপি আগবাঢ়িছে

ৰাইজৰ বাৰ্তা /নগাঁও:
“যদি তোমাৰ ডাক শুনে কেৱই না আসে, তবে একলা চলো ৰে...” — কবিগুৰু ৰবীন্দ্ৰনাথ ঠাকুৰৰ কালজয়ী গীতৰ সুৰেৰে যেন নিৰ্বাচনী প্ৰচাৰত নতুন বাৰ্তা দিলে নগাঁও লোকসভা উপ-নিৰ্বাচনৰ বিজেপি প্ৰাৰ্থী দেৱাশীষ শৰ্মাই।

কংগ্ৰেছে এতিয়াও প্ৰাৰ্থীৰ নাম আনুষ্ঠানিকভাৱে ঘোষণা কৰিব পৰা নাই। তাৰ বিপৰীতে বিজেপিয়ে ইতিমধ্যে নিৰ্বাচনী প্ৰচাৰত পূৰ্ণ গতিৰে নামি পৰিছে। দেৱাশীষ শৰ্মাক কেন্দ্ৰ কৰি নগাঁও আৰু মৰিগাঁও জিলাৰ বিভিন্ন অঞ্চলত চলিছে ব্যাপক জনসম্পৰ্ক অভিযান। সভা-সমিতি, দলীয় কৰ্মীৰ সৈতে বৈঠকৰ লগতে সাধাৰণ ভোটাৰৰ সৈতে পোনপটীয়া যোগাযোগৰ ওপৰতো গুৰুত্ব দিছে বিজেপিয়ে।

দেৱাশীষ শৰ্মাৰ বাবে নিৰ্বাচনী পথাৰত অন্যতম ডাঙৰ শক্তি হিচাপে চৰ্চালৈ আহিছে তেওঁৰ পূৰ্বৰ প্ৰশাসনিক পৰিচয়। নগাঁও আৰু মৰিগাঁও জিলাৰ আয়ুক্ত হিচাপে দায়িত্ব পালন কৰা সময়ত জিলাখনৰ বিভিন্ন প্ৰান্তৰ লোকৰ সৈতে তেওঁৰ যোগাযোগ গঢ় লৈ উঠিছিল। বিশেষকৈ সাধাৰণ ৰাইজৰ মাজত তেওঁৰ গ্ৰহণযোগ্যতা আৰু সংখ্যালঘু অধ্যুষিত অঞ্চলসমূহৰ লোকৰ সৈতে থকা সম্পৰ্ক এতিয়া নিৰ্বাচনী সমীকৰণত বিশেষ চৰ্চাৰ বিষয় হৈ পৰিছে।

ইফালে, কংগ্ৰেছে যদি বটদ্ৰৱা সমষ্টিৰ প্ৰাক্তন বিধায়িকা শিৱামণি বৰাক প্ৰাৰ্থী হিচাপে প্ৰক্ষেপ কৰে, তেন্তে নিৰ্বাচনী যুঁজখন যথেষ্ট আকৰ্ষণীয় হোৱাৰ সম্ভাৱনা আছে। শিৱামণি বৰাৰ নিজৰ ৰাজনৈতিক পৰিচয় আৰু বটদ্ৰৱা অঞ্চলত সাংগঠনিক সম্পৰ্ক আছে। কিন্তু দেৱাশীষ শৰ্মাৰ ক্ষেত্ৰত বিশেষ সুবিধা হ’ব পাৰে নগাঁও-মৰিগাঁও জিলাত প্ৰশাসনিক বিষয়া হিচাপে কাম কৰাৰ সময়ত গঢ়ি উঠা ব্যক্তিগত জনসম্পৰ্ক।অৱশ্যে এই জনপ্ৰিয়তা ভোটলৈ কিমানদূৰ ৰূপান্তৰিত হয়, সেয়াই হ’ব মূল প্ৰশ্ন। কাৰণ নিৰ্বাচনী যুঁজত ব্যক্তিগত গ্ৰহণযোগ্যতাৰ লগতে দলীয় সংগঠন, বুথ পৰ্যায়ৰ শক্তি, ভোটৰ মেৰুকৰণ আৰু স্থানীয় ৰাজনৈতিক সমীকৰণেও নিৰ্ণায়ক ভূমিকা পালন কৰে।

আনহাতে, কংগ্ৰেছৰ ভিতৰচৰাত প্ৰাৰ্থিত্বক লৈ চলি থকা চৰ্চাইও নগাঁওৰ ৰাজনীতিক উত্তপ্ত কৰি তুলিছে। ৰকিবুল হুছেইনৰ পছন্দৰ প্ৰাৰ্থী হিচাপে চৰ্চিত দুৰ্লভ চমুৱাই যদি প্ৰাৰ্থিত্ব লাভ নকৰে, তেন্তে তথাকথিত **‘টীম ৰকি’**ৰ ভূমিকা নিৰ্বাচনত কিদৰে দেখা যায়, সেয়াও হ’ব অত্যন্ত গুৰুত্বপূৰ্ণ। প্ৰাৰ্থী ঘোষণাৰ পিছত কংগ্ৰেছৰ বিভিন্ন শিবিৰক একত্ৰিত কৰি দলটোৱে নিৰ্বাচনী যুঁজত কিমান শক্তিশালীভাৱে নামিব পাৰে, তাৰ ওপৰতো নিৰ্ভৰ কৰিব কংগ্ৰেছৰ সম্ভাৱনা।

এফালে প্ৰাৰ্থী ঘোষণাৰ অপেক্ষাত কংগ্ৰেছ, আনফালে ইতিমধ্যে প্ৰচাৰৰ মাটিত নামি পৰা বিজেপি। ফলত নগাঁও উপ-নিৰ্বাচনৰ প্ৰাৰম্ভিক পৰ্যায়ত দেৱাশীষ শৰ্মাই যেন সঁচাকৈয়ে “একলাই চলো ৰে” নীতিৰে আগবাঢ়িছে।

কিন্তু এই ‘একলাই যাত্ৰা’ শেষ পৰ্যন্ত বিজয়যাত্ৰালৈ ৰূপান্তৰিত হ’বনে? নে কংগ্ৰেছে শক্তিশালী প্ৰাৰ্থী আৰু ঐক্যবদ্ধ সংগঠনেৰে বিজেপিৰ আগ্ৰাসন ৰোধ কৰিব? নগাঁওৰ নিৰ্বাচনী যুঁজত এতিয়া এই প্ৰশ্নটোৱেই সৰ্বাধিক চৰ্চিত।