.jpeg)
ঢকুৱাখনাৰ চাৰিকড়ীয়া নৈত শোকাৱহ ঘটনা
নৈৰ সোঁতত উটি গৈ কৰুণ মৃত্যুক সাৱটিলে জাপান দাসে
ৰাইজৰ বাৰ্তা /ঢকুৱাখনা: ঢকুৱাখনাৰ চাৰিকড়ীয়া নৈত সংঘটিত হৈছে এক শোকাৱহ ঘটনা। নৈ পাৰ হ’বলৈ যোৱাৰ সময়ত প্ৰবল সোঁতত উটি গৈ কৰুণ মৃত্যুক সাৱটি ল’লে কচুগাঁৱৰ জাপান দাস নামৰ এজন লোকে।
জানিব পৰা মতে, শনিবাৰে বিয়লি গৰু বান্ধিবলৈ যোৱাৰ পিছৰে পৰা সন্ধানহীন হৈ আছিল জাপান দাস। গৰু বান্ধিবলৈ যাওঁতেই চাৰিকড়ীয়া নৈৰ সোঁতত উটি যোৱাৰ সন্দেহ কৰা হৈছে।
ঘটনাৰ পিছতে SDRFৰ দলে উদ্ধাৰ অভিযান আৰম্ভ কৰে। অৱশেষত আজি পুৱা ঢকুৱাখনা কলেজৰ পাছফালে নৈৰ পৰা জাপান দাসৰ মৃতদেহ উদ্ধাৰ কৰিবলৈ সক্ষম হয় SDRFৰ উদ্ধাৰকাৰী দলে।
মৃত জাপান দাস আছিল এগৰাকী সুদক্ষ ঢুলীয়া আৰু সাঁতোৰবিদ। তেওঁৰ এনে আকস্মিক আৰু কৰুণ মৃত্যুৰ খবৰে অঞ্চলটোত গভীৰ শোকৰ ছাঁ পেলাইছে। পৰিয়ালৰ লোক তথা আত্মীয়-স্বজনৰ মাজত সৃষ্টি হৈছে শোকাকুল পৰিৱেশ।