খালী হৈ পৰিল ফেন্সীবজাৰ

 

খালী হৈ পৰিল ফেন্সীবজাৰ! উঠাই দিয়া হ’ল পদপথৰ দোকান-পোহাৰ

NO VENDING ZONE ঘোষণাৰ পিছতেই MS আৰু HB পথত নিমাওমাও পৰিৱেশ

ৰাইজৰ বাৰ্তা, গুৱাহাটী, ১ ছেপ্টেম্বৰ:
গুৱাহাটীৰ ব্যস্ত ফেন্সীবজাৰত এতিয়া দেখা গৈছে এক সম্পূৰ্ণ ভিন্ন পৰিৱেশ। NO VENDING ZONE ঘোষণা কৰাৰ পিছতে ফেন্সীবজাৰৰ MS আৰু HB পথৰ পদপথত থকা দোকান-পোহাৰসমূহ উঠাই দিয়া হৈছে। ফলত সদায় গ্ৰাহক আৰু পথচাৰীৰ ভিৰেৰে ব্যস্ত হৈ থকা অঞ্চলটোত এতিয়া পৰিছে এক নিমাওমাও পৰিৱেশ।

পদপথ দখল কৰি ব্যৱসায় চলাই অহা একাংশ দোকান-পোহাৰ উচ্ছেদ কৰাৰ ফলত পথ দুটা অধিক মুকলি হৈ পৰিছে। আগতে পদপথ আৰু পথৰ কাষত দোকান-পোহাৰ বহি থকাৰ বাবে সৃষ্টি হোৱা ভিৰ আৰু যান-জঁটৰ পৰিৱৰ্তে এতিয়া পথচাৰীয়ে কিছু সকাহ লাভ কৰিছে।

ইফালে, হঠাতে দোকান-পোহাৰ উঠাই দিয়াত বহু ক্ষুদ্ৰ ব্যৱসায়ীৰ মাজত সৃষ্টি হৈছে অনিশ্চয়তা। দীৰ্ঘদিন ধৰি পদপথত ব্যৱসায় কৰি জীৱিকা নিৰ্বাহ কৰি অহা ব্যৱসায়ীসকলে এতিয়া বিকল্প ব্যৱস্থাৰ দাবী উত্থাপন কৰাৰ সম্ভাৱনা দেখা দিছে।

প্ৰশাসনৰ এই পদক্ষেপে ফেন্সীবজাৰৰ পদপথ দখলমুক্ত কৰাৰ ক্ষেত্ৰত নতুন অধ্যায়ৰ সূচনা কৰিছে যদিও, ক্ষুদ্ৰ ব্যৱসায়ীসকলৰ জীৱিকা আৰু পুনৰ সংস্থাপনৰ বিষয়টোৱেও সমানে গুৰুত্ব লাভ কৰিছে।

এতিয়া প্ৰশ্ন এটাই—পদপথ দখলমুক্ত হোৱাৰ পিছত ফেন্সীবজাৰ কিমান দিনলৈ এনেদৰে পৰিষ্কাৰ আৰু মুক্ত হৈ থাকে, সেয়াহে হ’ব লক্ষ্যণীয়।