‘আগৰ দৰে বিভেদ নাই কংগ্ৰেছত’ মহচিন খান। কংগ্ৰেছত আগতে বিবেদ আছিল নেকি ?

 ‘আগৰ দৰে বিভেদ নাই কংগ্ৰেছত’

মহচিন খানৰ মন্তব্যক লৈ নগাঁও উপ-নিৰ্বাচনৰ পূৰ্বে নতুন ৰাজনৈতিক চৰ্চা

ৰাইজৰ বাৰ্তা বিশেষ প্ৰতিবেদন : নগাঁও লোকসভাৰ উপ-নিৰ্বাচনক কেন্দ্ৰ কৰি অসম কংগ্ৰেছৰ ভিতৰচ’ৰাৰ ৰাজনীতি এতিয়া চৰ্চাৰ কেন্দ্ৰবিন্দু হৈ পৰিছে। ইয়াৰ মাজতে অসম প্ৰদেশ কংগ্ৰেছৰ মুখপাত্ৰ মহচিন খানে এটা ব্যক্তিগত ছেটেলাইট চেনেলৰ সাক্ষাৎকাৰত কৰা এক মন্তব্যই নতুনকৈ ৰাজনৈতিক প্ৰশ্নৰ অৱতাৰণা কৰিছে।সাক্ষাৎকাৰত মহচিন খানে কয় যে “আগৰ দৰে কংগ্ৰেছত বিভেদ নাই।” তেওঁৰ এই মন্তব্যই স্বাভাৱিকতেই এটা প্ৰশ্ন উত্থাপন কৰিছে—তেন্তে আগতে কংগ্ৰেছত বিভেদ আছিল নেকি? যদি আছিল, সেই বিভেদৰ পৰিসৰ কিমান আছিল আৰু বৰ্তমান সেই পৰিস্থিতিৰ কিমান পৰিৱৰ্তন ঘটিছে?ইফালে, নগাঁও লোকসভাৰ উপ-নিৰ্বাচনৰ বাবে কংগ্ৰেছে এতিয়াও প্ৰাৰ্থীৰ নাম প্ৰকাশ নকৰাক লৈও ৰাজনৈতিক মহলত চৰ্চা অব্যাহত আছে। প্ৰাৰ্থী বাছনিৰ ক্ষেত্ৰত দলৰ ভিতৰত মতভেদ বা একমতত উপনীত হোৱাত পলম হোৱাটোৱেই ইয়াৰ অন্যতম কাৰণ নেকি—সেয়া এতিয়া এক গুৰুত্বপূৰ্ণ প্ৰশ্ন হৈ পৰিছে।কেৱল প্ৰাৰ্থী বাছনিয়েই নহয়, বিগত সময়ছোৱাত কংগ্ৰেছৰ একাংশ নেতা-কৰ্মীয়ে দল এৰি আন ৰাজনৈতিক দলত যোগদান কৰা ঘটনাক লৈও দলটোৰ সাংগঠনিক স্থিতিক লৈ প্ৰশ্ন উত্থাপন হৈছে। এজনৰ পাছত আনজনে দল ত্যাগ কৰাৰ ঘটনাৰ আঁৰতো কংগ্ৰেছৰ আভ্যন্তৰীণ অসন্তুষ্টি বা মতবিৰোধে ভূমিকা লৈছে নেকি? নে ইয়াৰ আঁৰত আছে সম্পূৰ্ণ পৃথক ৰাজনৈতিক কাৰণ?অৱশ্যে, মহচিন খানৰ মন্তব্যৰ ভিত্তিতেই কংগ্ৰেছত বিভেদ আছে বা নাই বুলি চূড়ান্ত সিদ্ধান্তত উপনীত হোৱা সম্ভৱ নহয়। কিন্তু তেওঁৰ “আগৰ দৰে বিভেদ নাই” মন্তব্যই কংগ্ৰেছৰ পূৰ্বৰ আৰু বৰ্তমানৰ আভ্যন্তৰীণ পৰিস্থিতিৰ তুলনাক লৈ নতুন ৰাজনৈতিক বিতৰ্কৰ সৃষ্টি কৰিছে।নগাঁও উপ-নিৰ্বাচন ক্ৰমাৎ উত্তপ্ত হৈ অহাৰ সময়ত এতিয়া মূল প্ৰশ্ন—কংগ্ৰেছে কেতিয়া ঘোষণা কৰিব প্ৰাৰ্থীৰ নাম? প্ৰাৰ্থী বাছনিক লৈ দলৰ ভিতৰত সঁচাকৈ কোনো মতভেদ আছে নেকি? আৰু থাকিলে সেই মতভেদে নিৰ্বাচনী ফলাফলত কিমান প্ৰভাৱ পেলাব?

এই প্ৰশ্নসমূহৰ উত্তৰ সময়ৰ লগে লগে স্পষ্ট হ’ব। কিন্তু এটা কথা নিশ্চিত—মহচিন খানৰ এই মন্তব্যই নগাঁও উপ-নিৰ্বাচনৰ পূৰ্বে কংগ্ৰেছৰ আভ্যন্তৰীণ ৰাজনীতিক পুনৰ চৰ্চাৰ মাজলৈ আনিছে।