ৰকিবুল হুছেইনৰ অভিযোগক উচিত প্ৰত্যুত্তৰ দেৱাশীষ শৰ্মাৰ

ৰাইজৰ বাৰ্তা / নগাঁও: নগাঁও লোকসভা সমষ্টিৰ উপ-নিৰ্বাচনক কেন্দ্ৰ কৰি ৰাজনৈতিক বাক-বিতণ্ডা ক্ৰমাৎ তীব্ৰ হৈ উঠিছে। কংগ্ৰেছৰ জ্যেষ্ঠ নেতা তথা সাংসদ ৰকিবুল হুছেইনে কৰা বিভিন্ন অভিযোগৰ প্ৰত্যুত্তৰ দিছে বিজেপিৰ সম্ভাব্য প্ৰাৰ্থী হিচাপে চৰ্চিত দেৱাশীষ শৰ্মাই।

ৰকিবুল হুছেইনৰ মন্তব্যৰ প্ৰসংগত দেৱাশীষ শৰ্মাই কয়, “ৰকিবুল হুছেইনে সদনত মোক পদ্মশ্ৰী দিব লাগে বুলি কৈছিল। আজি মই নিৰ্বাচন খেলাৰ বাবে কি দানৱ হৈ গ’লো নেকি?” নিজৰ বিৰুদ্ধে উত্থাপিত অভিযোগক লৈ তেওঁ প্ৰশ্ন উত্থাপন কৰে।

তেওঁ লগতে কয় যে নিৰ্বাচনক কেন্দ্ৰ কৰি ভয় আৰু ৰাজনৈতিক চাপৰ বাবেই ৰকিবুল হুছেইনে “আবোল-তাবোল” কথা কৈছে। অভিযোগ উত্থাপনৰ পূৰ্বে তথ্য-পাতি ভালদৰে পৰীক্ষা কৰাৰো আহ্বান জনায় দেৱাশীষ শৰ্মাই।

দেৱাশীষ শৰ্মাৰ ভাষ্য, “মানুহে অলপ পঢ়া-শুনা কৰি অভিযোগ দাখিল কৰিব লাগে।” অৰ্থাৎ কেৱল ৰাজনৈতিক উদ্দেশ্যৰে অভিযোগ উত্থাপন নকৰি অভিযোগৰ ভিত্তি আৰু তথ্য সম্পৰ্কে স্পষ্ট হোৱাটো প্ৰয়োজন বুলি তেওঁ মন্তব্য কৰে।

উল্লেখ্য যে নগাঁও লোকসভাৰ উপ-নিৰ্বাচনক কেন্দ্ৰ কৰি ইতিমধ্যে শাসক-বিৰোধী শিবিৰৰ মাজত বাকযুদ্ধ তীব্ৰতৰ হৈছে। নিৰ্বাচনৰ দিন চমু চাপি অহাৰ লগে লগে প্ৰাৰ্থিত্বক কেন্দ্ৰ কৰি ৰাজনৈতিক সমীকৰণো অধিক আকৰ্ষণীয় হৈ পৰিছে।

ৰকিবুল হুছেইনৰ অভিযোগৰ পিছতে দেৱাশীষ শৰ্মাৰ এই প্ৰত্যুত্তৰে নগাঁৱৰ উপ-নিৰ্বাচনৰ ৰাজনৈতিক উত্তাপ আৰু অধিক বৃদ্ধি কৰাৰ সম্ভাৱনা দেখা গৈছে।