দুৰ্ঘটনাস্থলী পৰিদৰ্শন মুখ্যমন্ত্ৰী হিমন্ত বিশ্ব শৰ্মাৰ

 

ক্ষেত্ৰীৰ ভয়ংকৰ দুৰ্ঘটনাস্থলী পৰিদৰ্শন মুখ্যমন্ত্ৰী হিমন্ত বিশ্ব শৰ্মাৰ

নিহত প্ৰতিগৰাকী লোকৰ পৰিয়াললৈ ৫ লাখ টকাৰ ক্ষতিপূৰণৰ ঘোষণা

ৰাইজৰ বাৰ্তা | ক্ষেত্ৰী | ৩১ আগষ্ট:
ক্ষেত্ৰীত সংঘটিত ভয়ংকৰ পথ দুৰ্ঘটনাৰ পাছত সোমবাৰে দুৰ্ঘটনাস্থলী পৰিদৰ্শন কৰে অসমৰ মুখ্যমন্ত্ৰী ড০ হিমন্ত বিশ্ব শৰ্মাই। দুৰ্ঘটনাটোৰ পৰিস্থিতি বুজ লোৱাৰ লগতে ঘটনাস্থলীৰ সামগ্ৰিক অৱস্থাৰো পৰ্যালোচনা কৰে মুখ্যমন্ত্ৰীগৰাকীয়ে।

দুৰ্ঘটনাটোত প্ৰাণ হেৰুওৱা প্ৰতিগৰাকী লোকৰ পৰিয়াললৈ ৫ লাখ টকাকৈ ক্ষতিপূৰণ প্ৰদান কৰা হ’ব বুলি ঘোষণা কৰে মুখ্যমন্ত্ৰীয়ে। আনহাতে, দুৰ্ঘটনাত আহতসকলৰ চিকিৎসাৰ সকলো খৰচ চৰকাৰে বহন কৰিব বুলিও তেওঁ জানিবলৈ দিয়ে।

মুখ্যমন্ত্ৰীয়ে প্ৰকাশ কৰা অনুসৰি, পথটোৰ মেৰামতি আৰু ৰক্ষণাবেক্ষণৰ ক্ষেত্ৰত হোৱা অৱহেলাই দুৰ্ঘটনাটোৰ অন্যতম কাৰণ বুলি প্ৰাথমিকভাৱে ধাৰণা কৰা হৈছে। বিষয়টোক গুৰুত্বসহকাৰে লৈ পথটোৰ মেৰামতিৰ ক্ষেত্ৰত প্ৰয়োজনীয় ব্যৱস্থা গ্ৰহণৰ নিৰ্দেশ দিয়া হৈছে।

ইতিমধ্যে এই ভয়ংকৰ দুৰ্ঘটনাটোত ৭গৰাকী লোকৰ প্ৰাণহানি ঘটিছে। আনহাতে, ৬গৰাকী লোক বৰ্তমানো চিকিৎসাধীন হৈ আছে। আহতসকলক উন্নত চিকিৎসা প্ৰদানৰ বাবে প্ৰয়োজনীয় সকলো ব্যৱস্থা গ্ৰহণ কৰা হৈছে।

ঘটনাস্থলী পৰিদৰ্শন কৰি মুখ্যমন্ত্ৰীগৰাকীয়ে দুৰ্ঘটনাটোৰ কাৰণ সন্দৰ্ভত সংশ্লিষ্ট বিষয়াসকলৰ সৈতে আলোচনা কৰে আৰু ভৱিষ্যতে যাতে এনে ভয়ংকৰ দুৰ্ঘটনা সংঘটিত নহয়, তাৰ বাবে পথ সুৰক্ষা আৰু মেৰামতিৰ কামত অধিক গুৰুত্ব দিবলৈ নিৰ্দেশ দিয়ে।