তাতিকটা দুগ্ধ উৎপাদন সমবায় সমিতিৰ সভা

 মৈৰাবাৰী পাব্লিক লাইব্ৰেৰীত তাতিকটা দুগ্ধ উৎপাদন সমবায় সমিতিৰ সভা

আঞ্চলিক বাৰ্তা / মৈৰাবাৰী, ২৯ আগষ্ট: মৈৰাবাৰী পাব্লিক লাইব্ৰেৰীত আজি তাতিকটা দুগ্ধ উৎপাদন সমবায় সমিতিৰ এখন গুৰুত্বপূৰ্ণ সভা অনুষ্ঠিত হয়। সমিতিৰ বিভিন্ন বিষয়ৰ লগতে দুগ্ধ উৎপাদন বৃদ্ধি, দুগ্ধ উৎপাদকসকলৰ সমস্যা আৰু সমবায় সমিতিখন অধিক শক্তিশালী কৰাৰ সন্দৰ্ভত সভাত বিস্তৃতভাৱে আলোচনা কৰা হয়।সভাখনত মুখ্য অতিথি হিচাপে উপস্থিত থাকে ধিং সমষ্টিৰ বিধায়ক মেহবুব মোক্তাৰ। বিধায়কগৰাকীয়ে দুগ্ধ উৎপাদনৰ সৈতে জড়িত কৃষক তথা পশুপালকসকলৰ সৈতে মত বিনিময় কৰি তেওঁলোকৰ বিভিন্ন সমস্যা আৰু অভাৱ-অভিযোগৰ বিষয়ে বুজ লয়। লগতে গ্ৰামাঞ্চলৰ অৰ্থনীতি শক্তিশালী কৰাৰ ক্ষেত্ৰত দুগ্ধ উৎপাদন আৰু সমবায় ব্যৱস্থাৰ গুৰুত্বৰ ওপৰত গুৰুত্ব আৰোপ কৰে।সভাত সমিতিৰ সদস্যসকলে দুগ্ধ উৎপাদন আৰু বিপণনৰ ক্ষেত্ৰত সন্মুখীন হোৱা বিভিন্ন সমস্যাৰ বিষয়ে অৱগত কৰে। পশুপালকসকলক উন্নত প্ৰযুক্তি, উন্নত জাতৰ গৰু পালন, পশু চিকিৎসা সেৱা, গাখীৰৰ উচিত মূল্য লাভ আৰু দুগ্ধ উৎপাদন বৃদ্ধিৰ বাবে প্ৰয়োজনীয় সহায়-সহযোগিতা আগবঢ়োৱাৰ বিষয়েও আলোচনা কৰা হয়।বিধায়ক মেহবুব মোক্তাৰে দুগ্ধ উৎপাদকসকলৰ স্বাৰ্থত চৰকাৰী আঁচনি আৰু সুবিধাসমূহৰ সঠিক ব্যৱহাৰৰ ওপৰত গুৰুত্ব আৰোপ কৰে। সমবায় সমিতিৰ জৰিয়তে ক্ষুদ্ৰ আৰু মজলীয়া পশুপালকসকলক একত্ৰিত কৰি তেওঁলোকৰ আয় বৃদ্ধি কৰাৰ ক্ষেত্ৰত অধিক পদক্ষেপ গ্ৰহণৰ প্ৰয়োজনীয়তাৰ কথাও উল্লেখ কৰে।সভাখনত সমিতিৰ বিষয়ববীয়া, সদস্য তথা স্থানীয় গণ্যমান্য ব্যক্তিসকল উপস্থিত থাকে। সভাখনে তাতিকটা অঞ্চলৰ দুগ্ধ উৎপাদকসকলৰ মাজত নতুন উদ্যম সৃষ্টি কৰাৰ লগতে দুগ্ধ উৎপাদন খণ্ডক অধিক সুসংগঠিত কৰাৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰিব বুলি আশা প্ৰকাশ কৰা হয়।