বিধ্বস্ত ৰাষ্ট্ৰীয় ঘাইপথৰ বাবেই পুনৰ পথ দুৰ্ঘটনা

 ধূপগুৰিত প্ৰকাণ্ড গাঁতত পৰি বাগৰিল মালবাহী ট্ৰাক

ৰাইজৰ বাৰ্তা / ক্ষেত্ৰী, ৩১ আগষ্ট: 

বিধ্বস্ত ৰাষ্ট্ৰীয় ঘাইপথৰ বাবে ক্ষেত্ৰী অঞ্চলত পুনৰ সংঘটিত হৈছে পথ দুৰ্ঘটনা। ধূপগুৰি অঞ্চলত ৰাষ্ট্ৰীয় ঘাইপথৰ ওপৰত সৃষ্টি হোৱা প্ৰকাণ্ড গাঁতত পৰি এখন মালবাহী ট্ৰাক নিয়ন্ত্ৰণ হেৰুৱাই পথৰ কাষত বাগৰি পৰে।স্থানীয় ৰাইজৰ অভিযোগ অনুসৰি, দীৰ্ঘদিন ধৰি পথটোৰ অৱস্থা অতি শোচনীয় হৈ আছে। ঠায়ে ঠায়ে প্ৰকাণ্ড গাঁত সৃষ্টি হোৱাৰ ফলত যান-বাহনৰ চলাচলত যথেষ্ট অসুবিধাৰ সৃষ্টি হৈছে। বিশেষকৈ নিশাৰ ভাগত গাঁতসমূহ স্পষ্টকৈ দেখা নোপোৱাৰ বাবে দুৰ্ঘটনাৰ আশংকা অধিক বৃদ্ধি পাইছে।ইয়াৰ মাজতে ধূপগুৰিত সংঘটিত এই দুৰ্ঘটনাই পুনৰবাৰ ৰাষ্ট্ৰীয় ঘাইপথটোৰ জৰাজীৰ্ণ অৱস্থাৰ ছবিখন স্পষ্ট কৰি তুলিছে। সৌভাগ্যক্ৰমে এই দুৰ্ঘটনাত কোনো লোক হতাহত হৈছে নে নাই, সেয়া বাতৰি লিখাৰ সময়লৈকে নিশ্চিত হোৱা নাই।বিধ্বস্ত পথটো শীঘ্ৰে মেৰামতি কৰি যান-বাহন চলাচলৰ বাবে সুৰক্ষিত কৰি তুলিবলৈ সংশ্লিষ্ট কৰ্তৃপক্ষৰ ওচৰত দাবী জনাইছে স্থানীয় ৰাইজে। অন্যথা আগন্তুক দিনত এই পথত অধিক ভয়াৱহ দুৰ্ঘটনা সংঘটিত হোৱাৰ আশংকা প্ৰকাশ কৰিছে ৰাইজে।