.jpeg)
ঘৰৰ পুখুৰীত নিজহাতে মাছ ধৰিলে মন্ত্ৰী পীযুষ হাজৰিকাই
কৃষিৰ সমান্তৰালকৈ মীন পালনৰ জৰিয়তে গ্ৰাম্য অৰ্থনীতি শক্তিশালী কৰাৰ আহ্বান
বিশেষ প্ৰতিবেদন / ৰাইজৰ বাৰ্তা, ৩১ আগষ্ট:
আজিৰ দিনটো কিছু ব্যতিক্ৰমীভাৱে পাৰ কৰিলে মন্ত্ৰী পীযুষ হাজৰিকাই। নিজৰ ঘৰৰ পুখুৰীত নিজহাতে মাছ ধৰি পৰিয়ালৰ সৈতে এক সুন্দৰ আৰু আনন্দময় সময় উপভোগ কৰে মন্ত্ৰীগৰাকীয়ে। মাছ ধৰাৰ সেই মুহূৰ্তৰ কিছু আলোকচিত্ৰও সামাজিক মাধ্যমত প্ৰকাশ কৰে তেওঁ।
মাছ ধৰাৰ এই অভিজ্ঞতাৰ কথা উল্লেখ কৰি মন্ত্ৰী পীযুষ হাজৰিকাই কয় যে অসমৰ কৃষিৰ সমান্তৰালকৈ মীন পালন খণ্ডতো যথেষ্ট সম্ভাৱনীয়তা আছে। ৰাজ্যখনৰ যুৱপ্ৰজন্মক কৃষি আৰু কৃষিৰ সৈতে জড়িত আনুষংগিক খণ্ডসমূহত অধিক মনোনিৱেশ কৰিবলৈ তেওঁ আহ্বান জনায়।
মন্ত্ৰীগৰাকীয়ে কয় যে কৃষি আৰু মীন পালনৰ দৰে ক্ষেত্ৰসমূহত নতুন প্ৰজন্মই আগ্ৰহেৰে জড়িত হ’লে আত্মনিৰ্ভৰশীলতাৰ লগতে অসমৰ গ্ৰাম্য অৰ্থনীতিও অধিক শক্তিশালী হৈ উঠিব। স্থানীয়ভাৱে উপলব্ধ সম্ভাৱনাসমূহক কামত লগাই যুৱক-যুৱতীসকলে নিজস্ব কৰ্মসংস্থাপনৰ পথ সৃষ্টি কৰিব পাৰে বুলিও তেওঁ মত প্ৰকাশ কৰে।
তেওঁ যুৱপ্ৰজন্মক কৃষি তথা ইয়াৰ আনুষংগিক খণ্ডসমূহত মনোনিৱেশ কৰি অসমৰ গ্ৰাম্য অৰ্থনীতি শক্তিশালী কৰাৰ স্বাৰ্থত আন্তৰিকতাৰে প্ৰচেষ্টা চলাই যাবলৈ বিনম্ৰ আহ্বান জনায়।মন্ত্ৰী পীযুষ হাজৰিকাৰ ঘৰৰ পুখুৰীত মাছ ধৰাৰ এই সৰল মুহূৰ্তই এক বিশেষ বাৰ্তা বহন কৰিছে—কৃষি আৰু মীন পালন কেৱল জীৱিকাৰ মাধ্যমেই নহয়, ই অসমৰ গ্ৰাম্য অৰ্থনীতি আৰু আত্মনিৰ্ভৰশীলতাৰ এক শক্তিশালী আধাৰ হ’ব পাৰে।