নাবালিকাক দলৱদ্ধ ধৰ্ষণ

 

দিল্লীৰ কালকাজিত নাবালিকাক দলৱদ্ধ ধৰ্ষণৰ অভিযোগ: আৰক্ষীৰ গুলীত আহত অভিযুক্ত, এজন গ্ৰেপ্তাৰ

ৰাইজৰ বাৰ্তা 

কালকাজি মন্দিৰৰ সমীপৰ আস্থা কুঞ্জ পাৰ্কত ভয়ংকৰ ঘটনা | আৰক্ষীৰ পৰিচয় দি কিশোৰী আৰু বন্ধুক ভয় দেখুওৱাৰ অভিযোগ | আন দুই অভিযুক্তৰ সন্ধানত অভিযান

নতুন দিল্লীত সংঘটিত হৈছে এক চাঞ্চল্যকৰ দলৱদ্ধ ধৰ্ষণৰ ঘটনা। কালকাজি মন্দিৰৰ সমীপৰ আস্থা কুঞ্জ পাৰ্কত এগৰাকী ১৭ বছৰীয়া কিশোৰীক তিনিজন যুৱকে আৰক্ষীৰ পৰিচয় দি ভয়-ভাবুকি প্ৰদান কৰি ধৰ্ষণ কৰাৰ অভিযোগ উত্থাপন হৈছে। ঘটনাৰ পিছতে আৰক্ষীয়ে অভিযান চলাই এজন অভিযুক্তক গুলীয়াই আহত কৰি গ্ৰেপ্তাৰ কৰিছে। আন দুজন অভিযুক্ত বৰ্তমানেও পলাতক আৰু তেওঁলোকৰ সন্ধানত অভিযান অব্যাহত আছে।

আৰক্ষীৰ তথ্য অনুসৰি, সোমবাৰে সন্ধিয়া প্ৰায় ৭ বজাত কিশোৰীগৰাকী এগৰাকী ১৭ বছৰীয়া পুৰুষ বন্ধুৰ সৈতে কালকাজি মন্দিৰলৈ গৈছিল। পিছত দুয়ো আস্থা কুঞ্জ পাৰ্কৰ ফালে খোজকাঢ়িবলৈ যোৱাৰ সময়তে প্ৰায় ২৫ৰ পৰা ৩০ বছৰ বয়সৰ তিনিজন লোকে তেওঁলোকৰ ওচৰলৈ আহে। অভিযোগ অনুসৰি, তিনিওজনে নিজকে আৰক্ষীৰ লোক বুলি পৰিচয় দি কিশোৰী আৰু তেওঁৰ বন্ধুক ভয় দেখুৱায়।

অভিযোগ অনুসৰি, এজন অভিযুক্তই কিশোৰীগৰাকীৰ বন্ধুক আঁতৰাই ৰাখে আৰু আন দুজনৰ সৈতে মিলি কিশোৰীগৰাকীৰ ওপৰত যৌন নিৰ্যাতন চলায়। ঘটনাৰ পিছত আৰক্ষীৰ নিয়ন্ত্ৰণ কক্ষলৈ নিশা প্ৰায় ৮.৪৫ বজাত খবৰ যায়। ইয়াৰ পিছতে আৰক্ষীয়ে ঘটনাস্থলীত উপস্থিত হৈ কিশোৰীগৰাকীক চিকিৎসাৰ বাবে হাস্পতাললৈ প্ৰেৰণ কৰে। ঘটনাৰ সন্দৰ্ভত POCSO আইনৰ অধীনতো গোচৰ ৰুজু কৰা হৈছে।

ইফালে অভিযুক্তসকলৰ সন্ধানত আৰক্ষীয়ে অভিযান তীব্ৰতৰ কৰাৰ মাজতে এজন অভিযুক্তক বাইকত যোৱা অৱস্থাত আৰক্ষীয়ে আটক কৰাৰ চেষ্টা কৰে। আৰক্ষীৰ মতে, অভিযুক্তজনে আৰক্ষীৰ দললৈ গুলীচালনা কৰে। গুলীচালনাৰ সময়ত এজন হেড কনষ্টেবলৰ বুলেটপ্ৰুফ জেকেটত গুলী লাগে। আত্মৰক্ষাৰ বাবে আৰক্ষীয়ে গুলীচালনা কৰাত অভিযুক্তজনৰ সোঁ ভৰিত গুলী লাগে। পিছত তেওঁক গ্ৰেপ্তাৰ কৰি চিকিৎসাৰ বাবে AIIMS Trauma Centreলৈ লৈ যোৱা হয়।

গ্ৰেপ্তাৰ হোৱা অভিযুক্তজনক আছিফ বুলি চিনাক্ত কৰা হৈছে। আৰক্ষীয়ে এতিয়া ঘটনাৰ সৈতে জড়িত আন দুজন অভিযুক্তক বিচাৰি অভিযান চলাই আছে। লগতে পাৰ্ক আৰু ইয়াৰ আশে-পাশে থকা CCTV ফুটেজ পৰীক্ষা কৰাৰ লগতে ঘটনাস্থলীত অপৰাধ আৰু ফৰেনছিক দলেও তথ্য-প্ৰমাণ সংগ্ৰহ কৰিছে।

ঘটনাটোৱে ৰাজধানী দিল্লীত মহিলা আৰু কিশোৰীৰ সুৰক্ষা সন্দৰ্ভত পুনৰ প্ৰশ্ন উত্থাপন কৰিছে। অৱশ্যে গোচৰটোৰ তদন্ত বৰ্তমান চলি আছে আৰু আৰক্ষীৰ তদন্ত সম্পূৰ্ণ নোহোৱালৈকে অভিযোগসমূহক অভিযোগ হিচাপেই গণ্য কৰা হৈছে