ৰাজনগৰ ফেৰীঘাটত নৈত বাগৰিল বৈদ্যুতিক অট’
নাৱৰ পৰা নমাৰ সময়তে নিয়ন্ত্ৰণ হেৰুৱাই নৈত পৰিল বাহন; কথমপি প্ৰাণৰক্ষা চালকৰ
ৰাইজৰ বাৰ্তা
কাছাৰৰ কাটিগড়াত সংঘটিত হৈছে এক অঘটন। ৰাজনগৰ ফেৰীঘাটত নাৱৰ পৰা নমাৰ সময়তে নিয়ন্ত্ৰণ হেৰুৱাই নৈত বাগৰি পৰে এখন বৈদ্যুতিক অট’।
জানিব পৰা মতে, ৰাজনগৰৰ পৰা গণিৰগ্ৰাম অভিমুখে গৈ আছিল বৈদ্যুতিক অট’খন। ৰাজনগৰ ফেৰীঘাটত নাৱেৰে পাৰ হৈ নৈৰ পাৰলৈ নমাৰ সময়তে চালকে বাহনখনৰ নিয়ন্ত্ৰণ হেৰুৱাই পেলায়। ফলত অট’খন নৈত বাগৰি পৰি সম্পূৰ্ণৰূপে পানীত ডুব যায়।
এই ঘটনাত অট’খনৰ চালক খাইৰুল ইছলাম মজুমদাৰ নৈৰ পানীত পৰে যদিও কোনোমতে প্ৰাণৰক্ষা কৰিবলৈ সক্ষম হয়। স্থানীয় ৰাইজে তৎপৰতাৰে চালকজনক উদ্ধাৰ কৰি চিকিৎসাৰ বাবে হাস্পতালত ভৰ্তি কৰায়।
ইফালে, দুৰ্ঘটনাৰ পিছতে স্থানীয় ৰাইজে অভিযান চলাই নৈত ডুব যোৱা বৈদ্যুতিক অট’খনো উদ্ধাৰ কৰে। ঘটনাক কেন্দ্ৰ কৰি অঞ্চলটোত কিছু সময়ৰ বাবে চাঞ্চল্যৰ সৃষ্টি হয়।