তামাৰহাটত নিশা আৰক্ষীৰ ড্ৰাগছবিৰোধী অভিযান, হেৰ’ইনসহ তিনি যুৱক গ্ৰেপ্তাৰ
ৰাইজৰ বাৰ্তা
গোলকগঞ্জৰ তামাৰহাটত নিশা আৰক্ষীয়ে চলোৱা ড্ৰাগছবিৰোধী অভিযানত হেৰ’ইনসহ তিনিজন যুৱকক গ্ৰেপ্তাৰ কৰা হৈছে। আৰক্ষীৰ অভিযানক কেন্দ্ৰ কৰি অঞ্চলটোত সৃষ্টি হৈছে চাঞ্চল্য।
আৰক্ষীৰ সূত্ৰ অনুসৰি, তামাৰহাট আৰক্ষীয়ে নিশা এক গোপন খবৰৰ ভিত্তিত অভিযান চলায়। অভিযানৰ সময়ত সন্দেহজনকভাৱে ঘূৰি ফুৰা তিনিজন যুৱকক আটক কৰি তালাচী চলোৱাত তেওঁলোকৰ পৰা হেৰ’ইন উদ্ধাৰ হোৱা বুলি জানিব পৰা গৈছে।
আৰক্ষীয়ে গ্ৰেপ্তাৰ কৰা যুৱককেইজনক ইনজামুল হক, মনোৱাৰ হুছেইন আৰু জাকিৰ খান বুলি চিনাক্ত কৰা হৈছে। উদ্ধাৰ হোৱা হেৰ’ইনৰ পৰিমাণ সন্দৰ্ভত আৰক্ষীয়ে তদন্ত অব্যাহত ৰাখিছে।
ড্ৰাগছৰ সৰবৰাহ আৰু ব্যৱহাৰৰ বিৰুদ্ধে গোলকগঞ্জ মহকুমাৰ বিভিন্ন অঞ্চলত আৰক্ষীয়ে ধাৰাবাহিকভাৱে অভিযান চলাই আহিছে। তামাৰহাটৰ এই অভিযানো সেই ধাৰাবাহিক অভিযানৰ অংশ বুলি জানিব পৰা গৈছে।
ইতিমধ্যে গ্ৰেপ্তাৰ কৰা তিনিওজনৰ বিৰুদ্ধে আইনগত ব্যৱস্থা গ্ৰহণৰ প্ৰক্ৰিয়া আৰম্ভ কৰিছে আৰক্ষীয়ে। লগতে তেওঁলোকৰ সৈতে ড্ৰাগছ সৰবৰাহৰ কোনো বৃহৎ চক্ৰ জড়িত আছে নেকি, সেই সন্দৰ্ভতো আৰক্ষীয়ে তদন্ত চলাইছে। অভিযুক্তসকলৰ বিৰুদ্ধে তদন্ত আগবঢ়াৰ লগে লগে ঘটনাটোৰ অধিক তথ্য পোহৰলৈ অহাৰ সম্ভাৱনা আছে।